طراجي الشمال

طراجي الشمال

شواطئ شمال المغرب

أحسن طراجي تقدر ديرو لا بغيتي دوز أحسن تجربة ديال تريب فالبحر هو من تطوان تال السعيدية .. بيناتهم كاين تقريبا شي 30 بحر و كاين الأغلبية فين طونتي .

- إلى بديتي من تطوان عندك اول محطة اتمشي لفنيدق 
وتشد طاكسي ديال بليونش ب 12.درهم اتشوف شواطئ زوينة والماء ديالهم نقي بزاف و تمى جزيزة ليلى وجبل موسى لي تيطل على اسبانيا. 
ومن بعد اتخرج لطريق الساحلية وتشد طاكسي ولا اوطو صطوب لواد لو و قاع اسراس أول بحر تقدر طونتي فيه مي ماشي شي حاجة لي واعرة بزاف. من تطوان لهاد البحر اوطو سطوب كاينة، مي كاتبقا قليلة فالشمال مقارنة مع بلايص خرين فالمغرب.

- من وراه كاين تارغة لي حداها بحر سميتو أزنتي .. كاتقدا لي خاصك و كاتضرب شي 30 دقيقة على رجليك غاتوصل لأزنتي .. واعر حيت قليل فيه بنادم مقارنة مع تارغة و فيه شي كوانات مزيانين للتصاور .. و العود باش طيب موجود، لا كنتي أطونتي تما بعد على الجبل حيت كيكونو فراخ الفوق كيلوحو عليك الحجر هه .

- من ورا أزنتي كاينة السطيحة قرية واعرة فيها بحر زوين والى بغيتي تغول فوسط الجبال و المجاري المائية كاينة واحد لبلاصة بعيدة شويةعلى لبحر تمشي ليها على رجليك من تما غاتمشي للجبهة اتلقا الشواية على الجهد، مدينة صغيرة ، تقدا ليك القص ديالك وشنو خاصك و سير يا أما تاخد فلوكة كاتدخلك و تسركلك في مرس دار لي هوا البحر لي بين جوج صخرات، كايدخلوك ب 150 تال 200 درهم .. ولا كاتطلع واحد الجبل را كاينة الطريق و كاتخرج في مرس دار كاين واحد الضريح تما.. حاول تكون تما بكري باش تبحر و تهز قشك حيت ممنوع طونتي تما. يلا بغيتي طونتي فوت مرس الدار شوية كاتزيد مازال تكمل الطريق تفوت مرس دار اتلقا بحر آخر صغير و خاوي شويا اتفوتو تاهوا اتلقا بحر لي كبيير و فيه الرملة .. مني يباليك شوف على ليسر ديالك كاين واحد الجبل صغير طلع تما و طونتي ماكييينش لي يقرب ليك .. و كوان مهيب بالجهد كاتولي طل على كاع البحورة من الفوق التصاور تما كيجيو مهيبين .. ديو الما بزاف حيت كايخص تما لفوق مكينش مني تجيبو، العود باش طيب موجود .. و بات مرتاح الغد ليه فيق هز قشك و رجع تبحر فمرسدار و رجع للجبهة .. من هنا لقدام اوطوسطوب خاص تكون مرضي باش يوقف ليك شي حد .

- من الجبهة غاتمشي لcala iris كايديو ب 45درهم.. تما عندك toress و bades طوريس تقدا لي خصك و سير للبحر دوز على الغابة كاين بحر تما عادي، طونتي ليلة وحدة والغد ليه هز المسائل ديالك و حرك لباديس .. كاينة 8كم ديال بيست مشمشة ههه دي الما ماتشرب فالطريق .. ماكيناش الخضرة تما عدي بالروز وما جاور، باديس جزيرة مستعمرينها إسبانيا .. كاين مناظر مهيبين تما .. مني توصل سير فوت الناس لي مبحرين تال حدا واحد الجبل لي هوا الحد و طونتي تما ايضرك عليك الشمس تنعس تال 10 بيخير.. هاد الكوان كايجي ليه الملك مرة مرة يعني ديما لاكارط ناسيونال قريبة ههه .. تما كاتعوم و الحوت حدا رجليك .. بحر مهيب بالجهد.

 
- من بعد غادي تمشي 16كم ولا شوف شي طاكسي 20درهم كايديك لواحد الدوار منو تركب للحسيمة .. فالحسيمة كاين بحورة ديال المدينة دونك مكينش فين طونتي تبحر ليك ف كيمادو شي نهار و طلع فحالك ركب للناظور ..

-غادي توصل سول على طوبيس لي كايدي للطاكسيات دفرخانة .. تما اتركب قوليه اديك لحدا الجوندارم ويحطك غاضرب واحد الهودة تال dcharanna تما توصل كاين 2 بلايص يا أما طونتي على البحر ولا سير طونتي حدى الصخر كاين بحر فحال مرسدار و صغيير نقي بزاف داك البحر ..العود والما موجودين مي الما عيان من أحسن 5لتر ديال باهية حسن .. التقدية اتلقاو كلشي عند القهوة لي حدا الكابانوات .

-مني تسالي طلع مني جيتي تال حدا الجوندارم و ضربها لكالابلانكا ولا كاب دو طغوا فوغش .. كالابلانكا كاينة ليها طريق بزاف تما كاين فين طونتي .. و الما زرق .. كاين تا كاس العالم تما لي هو صخرة على شكل كاس..